Cine d'aventuras

O cine d'aventuras ye un chenero cinematografico caracterizau por a presencia d'un heroi (ficticio u real) inspirador d'un mito, a on gosa haber-ie escenas d'aventuras y batallas, a sobén de tipo caballeresco y que gosa tamién estar ambientau en epocas pasadas que se presentan de forma exalzadora, en presentando sin profundizar masiau o escenario de l'acción d'a cinta, que mesmo puet estar cuasi completament ficticio. Os personaches gosan estar fuertement caracterizaus, con un protagonista bueno y muit bueno y un malvau malo y muit malo qui terne que terne ye lo perdedor en a trama, en resultando victorioso siempre lo bien encarnau por o protagonista. De feito se tracta de cintas a on o guión no ye l'aspecto principal d'a cinta, que gosa estar o vestuario d'os actors y a escenografía d'a cinta. D'atra man l'acción relatada s'escayece siempre en puestos bien luent (en o tiempo u en o espacio u en toz dos) y exoticos, ya sía un castiello medieval ya se tracte d'una selva tropical u d'una galaxia muit lungatera.

Como toz os cheneros, as mugas d'o chenero no son mai prou claras, en podendo incluyir-se-ie aintro d'o chenero as cintas de cine de western, de cine belico, de cine historico, de cine de ciencia-ficción.... D'o cine d'aventuras en fan parte atros subcheneros, como puet estar o cine de capa y espada u lo cine d'aventuras colonials.